ah09073

Lux illuxit festive celebris qua terrenis Maria tenebris felix eripitur | Et aeternae lucis ad solium juxta regem regina filium mater assumitur | Ad honorem matris et gloriam ascendenti procedit obviam Christus alacriter | Et agentes diem laetitiae omnes cives beatae patriae occurrunt pariter | Affluentem castis deliciis et vernantem rosis ac liliis juvat adspicere | Juvat arcam dei cum canticis ordinatis choris hymnidicis sursum deducere | Admirantur humilem virginem cujus omnem transcendit ordinem praecelsa dignitas | Nec est tristi locus invidiae nam ipsius congaudet gloriae cunctorum caritas | Recognoscunt hanc esse feminam quae ruinam replens angelicam caelos laetificat | Mundus omnis hanc esse dominam et reginam cunctis beneficam sentit ac praedicat | Eia deo prae cunctis proxima quae cum eo regnas in anima simul et corpore | Claro tui conspectu filii tecum frui fac nos exsilii transacto tempore