ah09082

O si mihi rhetorica vis tota philosophica | Totus chorus Apollinis sic aspiret ut virginis | Digne promam praeconia quae mater est et filia sui patris | Hic res certant contrariae non obstat pudicitiae nomen matris | Hic ratio deluditur hic argumentum fallitur | Dum mater non corrumpitur nec virgo partu laeditur | Naturae lex convertitur vim majestas patitur deificae | Qui vim naturae tribuit hanc immutare potuit mirifice | Obstupescit mentium credulitas sensualis deficit profunditas | Dum tumescit uterus virginitas maritalis ubi est fecunditas | O vere prae ceteris admiranda dignitas virginis quae meruit gratiam divinitus | Ut naturae veteris solveretur finitas virgo ventre tumuit impraegnata caelitus | O felix puerpera singularis honoris | Cujus exstant viscera expertia doloris | In partu non corrumperis post partum flore frueris virginei pudoris | Tu via viris invia tori virilis nescia es mater genitoris | Tu castitatis speculum tu lilium candoris virtutum receptaculum tu balsamus odoris | Tu nardus aromatica tu verbi dei cella tu stella non erratica tu fluctuum procella | Tu florum flos virtutum dos tu scirpea fiscella propinans lac et mella | Tu noctis lux caecorum dux tu claritatis stella tu optima puella | Tu vas imbutum nectare virtutum sine compare tu trinitatis templum | Tu aequitatis semita humilitatis orbita munditiae exemplum | Tu de stirpe Davidica ex Jacob stella orta tu visio prophetica Ezechielis porta | Tu lilium convallium tu spes desperatorum humilium refugium solamen miserorum | O Maria tu virtutum regina | Vitae via tu mortis medicina | Virga Jessea tu vellus Gedeonis | Arens area tu rubus visionis | Tu thurea tu myrrhea tu thronus Salomonis | Tu mellea tu rosea tu fons salvationis | Per te stat lex te regem rex monilibus ornavit ceu sponsam decoravit | Tu vitae pax amoris fax tu reconciliatrix salutis reparatrix | Hoc carmen tibi offero o dulcis et decora pro me peccante misero tu filium exora | Tu mihi fac propitium suprema mortis hora tu mihi fer auxilium et veni sine mora | O rutilans aurora