ah10363

Exsultent filii sponsae Domini in honorem praesulis Nicolai magni meriti | Totus orbis jubilet nam ordines angelorum concinunt caeli lumine novo rutilant | Humano Deus generi consulens Nicolaum ordinaverat qui assidua ovibus pastor bonus esset hostia | Lycia quem ediderat splendidum Myreorum plaga florida sacratissimum spiritus in quo sancti est sacrarium | In pelvi steterat erectus claudae dedit gressum signo facto cypressum succidenti validam manu dederat | Expellit daemonis incursum lumen dedit caeco quod a nautis accepit frumentum distribuit damni nescium | Auro dato stuprum dessuasit proscriptos exemit de mortis lege dura trinos viros eruit Cedronem fecundum reddidit | Euphrosynae natum reddebat imago subtractus resignat opes caesa non renato barbaro sed statim in Christum credulo | In mari invocaris aura arridet clara non emanat oleum donec pontifex suae redux cathedrae | Samuel Davi regem unxerat Saul abjecto te divina gratia sacerdotio fecit fungi Aaron | Joseph Jacob paverat pascis populum manna caelesti petra propinans dulce poculum | Melchisedech ordinem Petri consequens humilitatem Pauli impleris sapientia | Job simplex et rectus Abrahae similis obedis te offerens in corde Isaac consocius | Nos tuis precibus commenda Domino supplices ecclesia pro sancta advocatus caelicus | O sancte Dei Nicolae nos custodi