h04690

Clama ne cesses quasi tuba exalta vocem tuam et annuntia populo meo scelera eorum et domui Jacob peccata eorum | Me enim de die in diem quaerunt et scire vias meas volunt | Quasi gens quae justitiam fecerit et quae judicium dei sui non dereliquerit | Rogant me judicia justitiae appropinquare deo volunt | Quare jejunavimus et non aspexisti humiliavimus animas nostras et nescisti | Ecce in die jejunii vestri invenitur voluntas et omnes debitores vestros repetitis | Ecce ad lites et ad contentiones jejunatis et percutitis pugno impie | Nolite jejunare sicut usque in hanc diem ut audiatur in excelso clamor vester | Numquid tale est jejunium quod elegi per diem affligere hominem animam suam | Numquid contorquere quasi circulum caput suum et saccum et cinerem sternere | Numquid istud vocabis jejunium et diem acceptabilem domino | Nonne hoc est magis jejunium quod elegi | Dissolve colligationes impietatis solve fasciculos deprimentes | Dimitte eos qui confracti sunt liberos et omne onus dirumpe | Frange esurienti panem tuum et egenos vagosque induc in domum tuam | Cum videris nudum operi ei et carnem tuam ne despexeris | Tunc erumpet quasi mane lumen tuum et sanitas tua citius orietur | Et anteibit faciem tuam justitiam et gloria domini colliget te | Tunc invocabis et dominus exaudiet clamabis et dicet ecce adsum