O constantia martyrum laudabilis o caritas inextinguibilis o patientia invicibilis quae licet inter pressuras persequentium visa sit despicabilis invenietur in laudem et gloriam et honorem in tempore retributionis
Sollempni carmine tuas Oswalde rex et martir splendide praeconamus laudes hodie | Generosam subolem te regio oriundum stemmate Brittania felix edidit | Felix plane tam nobili germine tanti regis atque martyris tanti denique pigneris conservatrix altrix genitrix | Qui sceptris potens Anglicis sedibus exaltatus est angelicis cum tripudio caelitum triumphale gestans bravium | Quam regni gloria praecelsum quem virtus et pietas et justitia summum coram Deo reddidit et hominibus | Quem sanguis inclytus aeternis adornat fascibus pro salute fidelis interceptum populi sorte bellica | Hic patriae pater et rector hic forma regnandi unica bonitatis specimen et speculum dulce fidei signaculum | Hic subditis Christum gentibus exemplo et verbo praedicat hic egenos manibus inexhaustis affectu paterno recreat | O vere admirandum et praedicandum tantae sanctitatis gratiam Christi munere pio regi praestitam | Ut vita gloriosa hic reverenter functus mortem dignissimam signis caelitus attestetur maximis | Cujus adhuc dextera pietatis cultu semper prodita corruptelae viget nescia | Cujus almi cineres et loca sacri conscia certaminis numquam supernis vacant medelis | Laus tibi fulgide martyr et regum piisime laus o tuis Oswalde sempiterna meritis | Laus regi martyrum qui te corona victoriae qui splendidis ornavit paradisi laureis | Laus trinitati per saecula cuncta regnanti
